ذبحتني في فيلم وبكت بمشهد دفنى.. إلهام شاهين تستعيد ذكرياتها مع يسرا – أخبار الجمهورية

قالت الفنانة إلهام شاهين خلال ندوة الاحتفاء بصديقتها  النجمة يسرا في مهرجان الجونة السينمائى تحت عنوان 50 سنة يسرا، إن علاقتهما ليست مجرد صداقة فنية، بل صداقة حقيقية تمتد لأكثر من خمسين عامًا، مؤكدة أن الناس دائمًا ما تسأل: “هو أنتم بتحبوا بعض كده بجد؟”  والإجابة كما قالت ضاحكة: “أيوه، إحنا فعلاً كده بجد”.

وأوضحت أن جيلها المكون من يسرا وهالة صدقي وليلى علوي يتميز بالترابط الإنساني الحقيقي، مضيفة:”إحنا مش بنشتغل مع بعض طول الوقت، لكن بنكلم بعض يوميا، ونتقابل ونسافر سوا، وحياتنا فيها دفء وجدعنة وصدق”.

وتابعت إلهام شاهين أن أجمل أوقاتها هى تلك التى تقضيها مع صديقاتها بعيدا عن الأضواء، قائلة:”لما بحب أريح نفسي من الشغل بروح أقعد معاهم من غير مكياج ولا لبس رسمي، بناكل ونهزر ونفتكر أيام زمان، وده أجمل إحساس في الدنيا”.

وتابعت شاهين، أن ما يراه الجمهور من صور وفيديوهات على السوشيال ميديا لا يعكس الحقيقة الكاملة لحياتهم، قائلة: “الناس بتشوفنا وإحنا بنضحك وبنرقص، لكن ما يعرفوش التعب اللي بنمر بيه. ممكن الفنان يكون مريض أو حزين أو فقد حد عزيز، وبرغم كده ينزل يشتغل عشان التزاماته”.

وأشارت إلى أن المهنة مليئة بالمخاطر، وروت بعض المواقف الصعبة التي مرت بها: “أنا اتحرقت والنار مسكت في شعري، ووقعت من فوق حصان وقعدت سنة أتعالج، وكنت هغرق أثناء تصوير (سجينتان).”

واستعادت ذكريات عملها مع يسرا في فيلم “بستان الدم” قائلة: “كان أول عمل يجمعنا، وكنت لسه في تانية معهد. في مشهد كانت يسرا بتدبحني وتدفنّي، والمخرج أشرف فهمي كان صارم جدًا، طلب من يسرا إنها تعمل المشهد بشكل حقيقي تقريبا، وأنا كنت تحت التراب فعلاً!”

وأضافت وهي تضحك: “يسرا كانت بتعيط وبتقول لى أنا خايفة عليك، وفضلت تبكي بحرقة قبل التصوير، وفعلاً حضنتني وقالت لي أنا بحبك، وده الموقف اللي عمره ما هيتنسيطى، والحقيقة علاقتنا مش تمثيل ولا دعاية، إحنا فعلاً بنحب بعض بصدق، واللى بينا مش مجرد زمالة فنية، دي عشرة عمر”.