ندى محمد صويرة… من نتيجة محبطة في الثانوية إلى شريكة في شركة تسويق تخدم أكثر من 50 عميلًا خليجيًا
ندى محمد صويرة… من نتيجة محبطة في الثانوية إلى شريكة في شركة تسويق تخدم أكثر من 50 عميلًا خليجيًا
“ما كانتش الثانوية هي الحكم… البداية الحقيقية بدأت بعد كده”، بجملة بسيطة لكنها صادقة، اختصرت ندى محمد صويرة، ذات الـ22 عامًا، مسيرتها اللي بدأت من لحظة إحباط إلى منصة نجاح.
خريجة كلية حاسبات ومعلومات – الجامعة الأهلية، ومؤمنة إن الدرجات مش دايمًا بتحدد المصير، بتحكي ندى قصتها وتقول:
> “الناس ممكن تفتكر إن الحكم الحقيقي بيكون بدرجة في شهادة، بس بالنسبة لي، حياتي بدأت بعد ما النتيجة ما كانتش على قد طموحي.”
في عز أزمة كورونا، وأثناء دراستها الثانوية، كانت ندى بتعاني من الملل، لكن جواها كان فيه شغف كبير ناحية عالم البيزنس. ما كانش فيه فرص واضحة، ولا تدريبات متاحة، لكن كان فيه دعم غير مشروط من والدها، اللي كان مصدر إلهامها الأول، وكل كلمة منه كانت بداية لبحث جديد.
بداية متواضعة… لكنها واعدة
قررت تبدأ من الصفر. اشتغلت كمترجمة مواقع، وده فتح ليها باب جديد على عالم الويب وتقنياته. وبالرغم إن كلية الحاسبات ما كانتش خطتها الأساسية، لكنها غيّرت مسار حياتها بالكامل.
من كورسات بسيطة إلى أول تدريب كـ Front-End Developer، وبعدها طورت نفسها لحد ما وصلت لمستوى Full-Stack Developer، واشتغلت في شركة عندها 8 فروع على مستوى الوطن العربي، وهناك سمعت لأول مرة عن WordPress… والفضول خلى الخطوة دي نقطة انطلاق جديدة.
الغياب المفاجئ… والعودة بالإصرار
وفاة والدها كانت صدمة كبيرة، توقفت عن العمل فترة، لكن الحلم ما توقفش. رجعت تاني، واشتغلت بشغف أكبر. خاضت تجربة العمل الحر (Freelancing)، واتعلمت من خلالها المسؤولية، والمرونة، وفن التعامل مع العملاء.
> “كل غلطة كانت درس، وكل عميل كان تجربة جديدة وسعت مداركي.”
بعد التخرج بتقدير جيد جدًا مع مرتبة الشرف، اشتغلت كـ Software Engineer في واحدة من أكبر شركات التدريب والتطوير في إفريقيا، وكـ WordPress Developer في شركة تسويق مصرية.
من الحلم إلى التنفيذ
لكن الحلم كان دايمًا أكبر. ندى ما كانتش عايزة تشتغل في الشركات… كانت عايزة تفهمها وتبني واحدة بنفسها.
وفعلًا، بالتعاون مع خطيبها المهندس أحمد حجاج – اللي كان صاحب الفضل الأول في تحويل الأفكار لطموحات ملموسة – ومع شريك سعودي، أسسوا شركة “آفاق” للتسويق الرقمي.
خلال سنة واحدة بس، قدرت “آفاق” تخدم أكتر من 50 عميل سعودي ومصري، وساعدتهم على تحقيق نتائج حقيقية.
> “لسه بنغلط وبنتعلم، بس كل يوم بنقرب أكتر من حلمنا.”
خطوة جديدة نحو المستقبل
مؤخرًا، قررت ندى تبدأ مرحلة أكاديمية جديدة، وقدّمت على ماجستير في BIS (Business Information Systems)، علشان تدمج بين شغفها بالتكنولوجيا وحبها العميق لإدارة الأعمال.
رسالتها واضحة وبسيطة:
“النجاح مش رقم في شهادة، ولا كان يومًا بالفلوس. النجاح الحقيقي إنك تكمل بعد كل سقوط، تلاقي شغفك، وتبني عليه قيمة حقيقية تسيب أثر وتسمع دعوة من قلب حد ساعدته. كل ده… هو النجاح بالنسبالي.”
