في خطوة لفتت أنظار طلاب العمارة، طوّر المعماري الشاب أحمد عياد أداة ذكية مبنية على الذكاء الاصطناعي، هدفها الرئيسي تبسيط طريقة عرض الأفكار المعمارية، بعيدًا عن التعقيد التقليدي المرتبط بالتقنيات الحديثة.
الأداة – وهي في الأصل Workflow داخل منصة ComfyUI – بتعتمد على رفع صورة واحدة فقط، لتقوم تلقائيًا بإنتاج صورتين بتنسيق Sketch:
الأولى بخطوط يدوية واضحة.
والتانية مضاف ليها ألوان خفيفة تساعد على إبراز العناصر الأساسية.
النتايج دي بتتستخدم بعد كده على برامج زي Photoshop علشان الطالب يقدر يكمّل عرضه أو دراسته بشكل احترافي.
والمميز في الأداة إنها مش بتشتغل مكان المستخدم، لكنها بتقدم قاعدة قوية وواضحة للبداية، وده بيوفر وقت وجهد كبير خاصة في المراحل الأولية من التصميم.
أحمد عياد وضح إن هدفه الأساسي هو “تسهيل دخول طلاب العمارة لعالم الذكاء الاصطناعي بدون رهبة أو تعقيد”.
وبيكمل:
“أنا مؤمن إن الذكاء الاصطناعي مش لازم يكون بعيد عن المعماريين، ومش لازم نفهمه كأنه سحر أو كود صعب. الفكرة كلها في أدوات بتخدمك وتفهمك، مش تحل مكانك.”
من أول يوم لنشر الأداة، بدأ طلاب كتير يشاركو نتايج استخدامها على السوشيال ميديا، وانتشرت فيديوهات أحمد بشكل واسع، وساهمت في توصيل الفكرة لعدد كبير من الطلاب اللي كانوا بيبحثوا عن حل سريع وواضح لتقديم شغلهم.
